Rom 15 | BOJ | STEP | Iga Kristen tamo siŋgila ti unum qaji iga na Kristen was qudei siŋgila saiqoji unub qaji naŋgi aqaryainjroqnsim naŋgo gulube qoboiyetnjroqnqom. Iga gago segi jejamu aqaryaiyqajqa are qalqasai.

Romans 15

Niŋgi Kristus aqa areqalo ti aqa kumbra ti dauryoqniye

1 Iga Kristen tamo siŋgila ti unum qaji iga na Kristen was qudei siŋgila saiqoji unub qaji naŋgi aqaryainjroqnsim naŋgo gulube qoboiyetnjroqnqom. Iga gago segi jejamu aqaryaiyqajqa are qalqasai. 2 Iga segi segi na gago Kristen was naŋgi aqaryainjroqnqom. Osim dena iga naŋgo are siŋgilatetnjrim naŋgi bole sqab. 3 Iga qalie, Kristus a dego aqa segi jejamu aqaryaiyqajqa are qalosaioqnej. Agi Kristus a nami endegsi Qotei pailyej, “O Abu, tamo qudei naŋgi ni qa anjam uge mareqnub. Naŋgo anjam di e qa dego mareqnub.” O was qu, Qotei aqa anjam di agi neŋgreŋq di unu. 4 Qotei aqa anjam kalil naŋgi nami neŋgreŋyeb qaji di iga Qotei aqa gam osorgwajqa deqa osib neŋgreŋyeb. Anjam dena gago areqalo siŋgilatetgim iga siŋgila na tigelosim Qotei na mondoŋ iga oqajqa deqa tariŋoqnsim sqom. Utru deqa neŋgreŋyeb. 5 Qotei a segi na gago areqalo siŋgilatetgeqnu. A segi na iga aqaryaigeqnu deqa iga siŋgila na tigeleqnum. Ariya Qotei na niŋgi aqaryaiŋgimqa niŋgi Kristus Yesus aqa kumbra dauryosib areqalo qujaitosib soqniye. 6 Sosib niŋgi kalil medabu qujaitosib gago Tamo Koba Yesus Kristus aqa Abu Qotei aqa ñam soqtoqniye.

Kristus a na Juda tamo naŋgi ti sawa bei bei qaji tamo naŋgi ti aqaryainjrej

7 Kristus a nami niŋgi osiq geregereiŋgej dego kere niŋgi dego nuŋgo Kristen was qu naŋgi oqnsib geregereinjroqniye. Yim nuŋgo kumbra dena niŋgi Qotei aqa ñam tulaŋ soqtoqnqab. 8 E endegsi marqai. Kristus a Juda naŋgi aqaryainjrqa oqnsiq wauoqnej. Qotei aqa anjam a bole di naŋgi qalieqajqa deqa osiq wauoqnej. Anjam Qotei na nami Juda naŋgo moma utru naŋgi minjroqnej qaji di siŋgilatqajqa deqa ti Kristus a wauoqnej. 9 Ariya Kristus a sawa bei bei qaji naŋgi qa dego wauoqnej. Di kiyaqa? Qotei a naŋgi qa dego are tulaŋ boleiyej. Aqa kumbra di naŋgi unsib aqa ñam soqtqajqa deqa Kristus a wauoqnej. Agi Qotei aqa anjam bei nami endegsib neŋgreŋyeb unu,

“E sawa bei bei qaji naŋgo ambleq dia ino ñam soqtqai.
E ino ñam soqtqa osiy ni qa louoqnqai.”
10 Anjam bei dego unu, “O sawa bei bei qaji tamo uŋgasari, niŋgi ti Qotei aqa segi tamo uŋgasari kalil naŋgi ti koba na areboleboleiŋgim soqniye.” 11 Olo anjam bei dego unu,

“O sawa bei bei qaji tamo uŋgasari kalil,
niŋgi Tamo Koba Qotei aqa ñam soqtoqniye.
O tamo uŋgasari sawa sawa kalilq di unub qaji,
niŋgi aqa ñam soqtoqniye.”
12 Ariya Aisaia a dego Qotei aqa medabu osiq anjam bei endegsi marej, “Mondoŋ Devit aqa abu Jesi aqa leŋ dena mandor kobaquja bei brantqas. Brantosim a na sawa bei bei qaji tamo uŋgasari kalil naŋgi taqatnjresqas. A bosim naŋgi boletnjrqajqa deqa naŋgi a qa tariŋoqnsib sqab.”

13 O was qu, Qotei a nami iŋgi bole bole di iga egwajqa marej deqa iga bini tariŋoqnsim unum. Niŋgi a qa nuŋgo areqalo siŋgilateqnub deqa a na nuŋgo are boletetŋgimqa niŋgi tulaŋ areboleboleiŋgim lawo na sqab. Yim Qotei aqa Mondor na niŋgi siŋgilatŋgimqa niŋgi iŋgi bole bole a na eŋgwa marej qaji deqa tariŋoqnsib sqab.

Pol a Qotei aqa wau ojoqnej deqa a tulaŋ areboleboleiyej

14 O was qu, ijo are miligiq di e qalieonum, niŋgi kumbra bole gaigai yeqnub. Niŋgi tulaŋ powo koba ti unub deqa niŋgi segi segi na Qotei aqa tamo uŋgasari naŋgi gam bole osornjreqnub. 15 Ijo anjam mutu qudei e neŋgreŋyonum qaji endi anjam siŋgila. Qotei a e qa are boleiyonaq wau ebej niŋgi deqa olo are walŋgaim deqa e anjam endi neŋgreŋyonum. 16 E Kristus Yesus aqa wau tamo deqa e sawa bei bei qaji tamo naŋgo ambleq dia wauoqnsim Qotei aqa anjam bole naŋgi minjreqnum. E na naŋgi osiy Qotei aqaq dia atrainjrobulitqa a naŋgi eleŋqajqa deqa waueqnum. Qotei aqa Mondor na naŋgi siŋgilatnjrimqa naŋgi Qotei aqa segi tamo uŋgasari sosib kumbra bole yoqnqajqa deqa e naŋgi qa waueqnum.

17 Aqo Kristus Yesus wo ombla waueqnum deqa e Qotei aqa wau endi yqajqa tulaŋ areboleboleibeqnu. 18 E iŋgi bei qa merŋgwasai. Kristus a ijo baŋ na wau yeqnu qaji deqa segi niŋgi saiŋgwai. A na ijo medabu siŋgilatetboqnsiqa ijo baŋ na wau bole bole yeqnu. A na e siŋgila ebeqnaqa e maŋwa gargekoba yeqnum. Qotei aqa Mondor na dego e siŋgilatbeqnaqa e waueqnum. Kristus a kumbra kalil di yeqnu. Di kiyaqa? A na sawa bei bei qaji naŋgo are tigeltetnjrimqa naŋgi Qotei aqa anjam dauryqajqa deqa. Utru deqa e Jerusalem dena wau utru atsim Kristus aqa anjam bole mare mare laqnsim gilsim torei Ilirikum sawaq dia diŋtem. 20 Ariya e na tamo uŋgasari Kristus aqa ñam qaliesai qaji naŋgo sawaq dia aqa anjam bole palontqajqa are qaleqnum. Tal aqa ai utru tamo bei na tigeltej qaji dia e olo tal atqajqa are qalosaieqnum. 21 Agi Qotei aqa anjam bei nami endegsib neŋgreŋyeb unu, “Tamo naŋgi Kristus aqa ñam nami quosai qaji naŋgi a unqab. Tamo naŋgi aqa anjam nami quosai qaji naŋgi qusib a qa poinjrqas.”

Pol a mati Rom naŋgi unjrsim Spen sawaq aiqas

22 O was qu, e wau di yeqnum dena e niŋgi qa bqajqa gam geteŋeqnu. Deqa e niŋgi qa bqa yeqnam keresaiibeqnu. 23 Ariya bini e sawa endia wau bei saiqoji. Wausau gargekoba e niŋgi nuŋgwajqa are qaloqnem. 24 Deqa e Spen sawaq aiqa osiyqa e mati niŋgi qa bosiy nuŋgsiy niŋgi ti koba na sokiñalayitqa niŋgi iŋgi iŋgi qa aqaryaibibqa e Spen sawaq aiqai.

25 Ariya e mati Jerusalem gilsiy dia Qotei aqa tamo uŋgasari naŋgi unjrsiy aqaryainjrqai. 26 Qotei aqa tamo uŋgasari Masedonia sawa ti Akaia sawa ti di unub qaji naŋgi na Kristen tamo uŋgasari Jerusalem dia iŋgi iŋgi qa truqueqnub qaji naŋgi aqaryainjrqa marsib silali koroiyeb unu. 27 Naŋgi naŋgo segi areqalo na silali di koroiyeb. Naŋgo kumbra di bole. Di kiyaqa? Naŋgi na kamba iŋgi deqaji olo Juda naŋgi enjrqajqa wau ti deqa. Juda naŋgi na naŋgi Qotei aqa anjam qa aqaryainjreqnub deqa naŋgi na kamba olo Juda naŋgi jejamu qa iŋgi iŋgi qa aqaryainjrqajqa wau ti.

28 Deqa e mati wau di kobotosiy silali di Jerusalem osiy gilsiy bunuqna e Spen sawaq aiqa osiy e niŋgi qa bosiy nuŋgwai. 29 E qalieonum. E niŋgi qa bqai di e Kristus aqa kumbra bole osi bosiy niŋgi osorŋgitqa dena niŋgi siŋgilaqab.

30 O was qu, niŋgi gago Tamo Koba Yesus Kristus a qa ti qalaqalaiyo kumbra Qotei aqa Mondor na iga osorgeqnu qaji deqa ti are qalsibqa e ombla na Qotei pailyqajqa waukobaoqniye. Osib niŋgi e qa dego Qotei pailyoqniye. 31 Yim a na e aqaryaibosim anjam gotraŋyo tamo Judia sawaq di unub qaji naŋgo baŋq dena e olo oqas. Niŋgi Qotei pailyibqa a na aqa segi tamo uŋgasari Jerusalem di unub qaji naŋgo are tigeltetnjrimqa e na naŋgi silali qa aqaryainjreqnum ijo wau deqa naŋgi tulaŋ areboleboleinjrim sqab. 32 Deqa Qotei na marim e niŋgi qa bosiy nuŋgsiy dena e areboleboleibqas. Osiy niŋgi koba na aqaratosiy dena siŋgila oqai.

33 Qotei a na iga so bole ti lawo kumbra ti egeqnu. A niŋgi kalil koba na soqnebe. Bole.